बज्जिका भाषा आ संस्कृतिपर चर्चा

रौतहटके गौरमे बज्जिका भाषा आ संस्कृतिपर चर्चा कएलगेल हए । ग्रामीण शिक्षा विकास नेपाल जेठरहियाके आयोजना आ जिला विकास समिति रौतहटके सहयोगमे गौरस्थित होटल सिया प्यालेसमे संचालित दू दिवसीय कार्यक्रमके उदघाटन करइत निमित्त स्थानीय विकास अधिकारी गजेन्द्र प्रसाद यादव मातृभाषाके सम्मानसे माता आ माटी दुनुके सम्मान होएके बतएलन् । संस्कृतिके संरक्षण करनाइ भी ओतने जरुरी रहल यादवके कहनाम हए । नेपाल शिक्षक युनियन रौतहटके निवर्तमान अध्यक्ष योगेन्द्र प्रसाद यादव, बज्जिका भाषा विकास परिषद नेपालके अध्यक्ष शिवचन्द्र साह, बज्जिका प्रशिक्षक विपिन बिहारी सिंहलगायतके लोग बज्जिका संस्कृति आ भाषाके विविध विषयपर प्रकाश पारइत बज्जिकाके संरक्षण आ विकासपर जोर देलन् । सर्लाही, रौतहट, बारा आ भारतके सीतामढी जिलासे संचारकर्मी तथा बज्जिका भाषासेवीलोगके सहभागिता रहल कार्यक्रममे बज्जिका लेखिका मेनका साह, समतोलिया मुखिया, नेपाल बज्जिका शिक्षक प्रतिष्ठानके अध्यक्ष सफिन्द्र प्रसाद यादव, नेपाल पत्रकार महासंघ रौतहट शाखाके अध्यक्ष शैलेन्द्र प्रसाद गुप्ता, दैनिक भास्करके बैरगनिया सम्वाददाता लगायतके लोग बज्जिका लोकसंस्कृतिके विकास आ विस्तारपर जोर देलन् । कार्यक्रमके अध्यक्षता आयोजक संस्थाके अध्यक्ष जयप्रकाश यादव कएले रहे ।