बारासे महोत्तरीतक बोलेजाएबाला बज्जिका भाषा अपनेआपमे पूर्ण भाषा रहल सर्वेसे देखलगेल हए । त्रिभुवन विश्वविद्यालयके भाषाविज्ञान केन्द्रीय विभागद्वारा पर्हु कएलगेल स्थलगत सर्वेसे तयार पारलगेल रिपोर्टमे बज्जिका पूर्ण भाषा रहल स्पष्ट कएलगेल हए । त्रिभुवन विश्वविद्यालयके भाषाविज्ञान केन्द्रीय विभागके विभागीय प्रमुख प्रा.डा. दानराज रेग्मीके नेतृत्वमे एगो टोली पर्हु सर्लाहीके मलंगवा, बरहथवा, रौतहटके गरुडा, गौर आ कटहरियामे कार्यक्रम कऽके विभिन्न व्यक्तिके साथे बोलचालके सर्वे कएले रहे । स्थलगत सर्वेके टोलीमे डा. बलराम प्रसाइँ, डा. अम्बिका रेग्मी, गोपाल ठाकुर आ भाषाविज्ञान विभागसे सम्बन्धित आउरो कुछ सदस्यके सहभागिता रहलरहे ।
नेपालके भाषिक सर्वेक्षण परियोजनाके निर्देशकसमेत रहल प्रा.डा. रेग्मीके टोलीद्वारा कएलगेल अध्ययनके रिपोर्ट तयार होएलापर रेग्मी प्रतिक्रिया देइत कहलन् “बज्जिका अपनेआपमे पूर्ण भाषा हए ।” विभिन्न परोसी भाषासब बज्जिकाके उपर अप्पन दाबी ठोकरहल अवस्थामे त्रिविके भाषाविज्ञान विभागके स्थलगत सर्वेके बाद आएल रिपोर्टसे भाषावैज्ञानिक दृष्टिसे बज्जिका पूर्ण आ स्वतन्त्र भाषा रहल प्रमाणित भेल हए ।
“अ सोसियोलिङ्ग्विस्टिक सर्वे अफ बज्जिका” नाओ रहल रिपोर्टके त्रिविके लेल प्रा.डा. दानराज रेग्मी, डा. बलराम प्रसाइँ आ डा. अम्बिका रेग्मी प्रस्तुत कएलेछथिन् । १३५ पेजके प्रतिवेदनके नौ अलगअलग भागमे तयार कएलगेल हए । जुलाई २०१४मे तयार कएलगेल रिपोर्टसे बज्जिकाके आधिकारिकरुपसे पूर्ण बज्जिकाके मान्यता प्राप्त भेल हए । बज्जिकापर विश्वविद्यालयके भाषाविज्ञान केन्द्रीय विभागद्वारा पहिलबेर स्थलगत सर्वेक्षण कऽके आधिकारिकता देलासे बज्जिकाभाषीके पूर्ण भाषाके दाबी ठीक रहल साबित भेल हए ।
भाषाविज्ञान केन्द्रीय विभागके तरफसे भाषावैज्ञानिक अध्ययनके बाद बज्जिकाके आधिकारिक तौरपर पूर्ण भाषाके रिपोर्ट अएलासे बज्जिकाभाषीपर न्याय भेल प्रतिक्रिया देलजारहल हए । नेपालके प्राचीन भाषामेसे एगो रहल बज्जिकाके बोलेबाला नेपालमे पचीस लाखसे बेसी हए मगर पछिलका जनगणनासे सातमा लमहर भाषाके रुपमे आएके करिब आठ लाख लोग मातृभाषाके रुपमे लिखएले हए । बज्जिका चेतनाके पक्षमे एगो बहुत सकारात्मक आ ठोस उपलब्धि रहल कहइत बज्जिका भाषा विकास परिषद् नेपालके केन्द्रीय अध्यक्ष शिवचन्द्र शाह प्रतिक्रिया देलेछथिन् ।
No comments:
Post a Comment